Fernijde fyts- en kuierrûte 'Sagen jagen troch de Fryske Wâlden'
Hjoed fytsten sa’n tritich minsken in diel fan de fernijde fyts- en kuierrûte 'Sagen jagen troch de Fryske Wâlden', makke troch stichting Dam Jaarsma. De rûte fan 15 of 40 km is oanfolle mei in keunstwurk en ‘ferhalebankjes’, dy’t ús op in hjoeddeistige wize de folksferhalen út ús omjouwing fertelle. Dy folksferhalen binne sammele troch Dam Jaarsma (1914 -1991) út Eastermar en ynsprutsen troch ferhaleferteller Douwe Kootstra.
Wethâlder Tytsy Willemsma ûntbleate ûnderweis it keunstwurk ‘Allinne’ mei in gedicht fan Dam Jaarsma, foarmjûn troch keunstner Wietske Lycklama à Nijeholt. Wethâlder Tjibbe Brinkman (fan Achtkarspelen) presintearre efkes letter in bysûnder ferhalebankje by De Spitkeet op De Harkema. It bankje is ûntwurpen en makke troch Egbert Teeninga.
Mear ynformaasje
Wolle jo de rûte ek ris fytse of rinne? Helje dan de folder op by it startpunt, fytsknooppunt 79 yn Eastermar of bygelyks by it gemeentehûs yn Burgum of Bûtenpost.
Sjoch foar mear ynformaasje op de doarpsside fan Eastermar.
